Nagsaka na sa 32 ang numero sang mga indibidwal nga nautas ang kabuhi sa nagluntad nga sunog sa isa ka bar sa Bangkok, Thailand sang Dominggo sang gab-i.
Nagdagsa ang mga survivor kag mga himata sang mga nagtaliwan sa isa ka police station sa Bangkok kahapon agud magpangayo sang bulig para sa kompensasyon, kuhaon ang mga nabilin nga mga gamit, kag maghatag sang pahayag angot sa insidente.
Suno sa Bangkok Metropolitan Administration, kapin 70 ang pilason sa sunog nga nagtupok sa Rong Beer Na Ladprao bar.
Ang 15 sa mga nasamaran ang nagapabilin nga kritikal ang kondisyon.
Suno sa abogado sang tag-iya sang bar, ang mga survivor kag mga himata sang nagkalamatay ang makabaton una sang 10,000 baht ukon kapin P18,000 bilang kompensasyon.
Apang suno sa isa ka pamilya, indi ini supisyente para sa tanan nga galastuson sa pagpalubong sang ila himata.
Padayon naman ang imbestigasyon sang mga otoridad agud matumod ang gintunaan sang kalayo.
