Excited na ang mga fans sang Spain sa FIFA World Cup 2026 Finals sa tunga sang Spain kag Argentina nga patigayunon alas-3:00 sang kaagahon (oras sa Pilipinas) sa Dominggo.
Ini matapos malutos sang Spain ang France sa semifinal sang Hulyo 15.
Sa interview sang Bombo Radyo kay John Mark Deles, Bombo International News Correspondent derekta sa Spain, ginpahayag sini nga mabatyagan sa mga pumuluyo sa Spain ang kahidlaw matapos ang makasaysayan nga kampeonato sang 2010 kag dako ang ila mga paglaum nga makuha sang pungsod ang kampeonato sa Dominggo.
Suno kay Deles, tuman ang kalipay sang mga tawo kag madamo sang nagselebrar matapos ang kadalag-an sang Spain batok sa France.
Suno diri, ginalauman nga mapuno sang mga tawo ang public viewing area kun sa diin nakahanda na ang dalagko nga LED screen kag projector para sa live broadcast sang hampang.
Dugang pa, mangin ang mga restaurant kag iban pa nga establisyimento ang nakapwesto na sa ila nga telebisyon.
Suno kay Deles, madamo sang mga Espanyol ang nagapati nga dako ang tsansa sang Spain nga makuha ang kampeonato bangud sa ginpakita nga maayu nga performance sang mga star player sang koponan.
Madumduman nga luwas sa World Cup title sang 2010, apat ka beses nga nangin kampeon ang Spain sa UEFA European Championship kag naangkon man sini ang UEFA Nations League sang 2023, rason agud napabilin ini nga kalakip sa pinakamalig-on nga koponan sa football.
