Aminado ang Bacolod City Police Office nga challenge para sa mga kapulisan ang mga nagakatabo nga pagpamahog sa mga eskwelahan.
Sa interview sang Bombo Radyo Bacolod kay Police Lt Col Lester Leada, Deputy City Director for Operation sang BCPO, imbes nga sila ang makafocus sa crime deterrence, nagakatunga ang ila atensyon sa pagsecure sang mga buluthuan bangod sa mga security threats.
Sila ang nagadeploy man sang dugang nga police visibility sa gwa sang mga buluthuan, agud madasig nga makaresponder kun may mga insidente.
Kaangay na lamang sa nakita nga bala sa University of Negros Occidental – Recolletos (UNO-R) kahapon nga may kaupod nga written note sang pagpamahog nga tiruhon sini ang iya gintawag nga ‘bully.’
Kasubong man ang nabatun nga mensahe sa social media sang estudyante sa University of Saint La Salle – Bacolod nga naga-alegar nga may duha ka estudyante nga tiruhon sa ila buluthuan.
Suno kay Leada, ginatumod pa nila kun sin-o ang may kahimuan sang pagpamahog.
Pasalig sini nga ginaseryoso gid sang kapulisan kun may kaangay nga mga report ini ang gikan man sa government, private, ukon public places, kag sila ang nagakoordinar gid sa mga institusyon.
Ginahatagan man nila sang tyansa ang mga buluthuan sa pagresolbar sang pila ka mga issue ilabi na sa mga kaso sang bullying.
Pahanumdom ni Leada sa mga kabataan nga kun sila ang makaeksperyensya gid man sang pagpangbully, indi ibutang sa kaugalingon nga kamot ang hustisya, sa baylo dapat nga ireport sa nagakaigo nga otoridad.
Apang aminado man si Leada nga kun kis-a lain ang ginapagwa nga motibo sa matuod-tuod rasun sa paghimo sang krimen.
