Patay ang onse anyos nga bata samtang pilason naman ang iya magulang nga 16 anyos matapos nga sila ang ginbuno sang ila tiyo sa Habay-Habay, Brgy Candabong, Manjuyod, Negros Oriental.
Ang 11 anyos ang ginkilala nga si Alyas Meldib, Grade 6 pupil, samtang ang 16 anyos ang ginkilala naman nga si Alyas Melden, lalaki, residente sa nasambit nga lugar.
Samtang nag-utas man sang iya kabuhi ang suspect nga ginkilala nga si Alyas Jobert, 28 anyos.
Sa interview sang Bombo Radyo Bacolod kay Police Major Jaypee Dagami, hepe sang Manjuyod Municipal Police Station, ang duha ka biktima upod sa iban pa nila nga ka-utoran kag sa ila tiyo ang magapanyaga na kuntani sa balay sang amay sang suspect, ukon sa lolo sang mga kabataan nga si Juanito Amorado.
Apang hinali lamang nga ginbuno ni Jobert si Meldib gamit ang hunting knife, nga nag-igo sa natuo nga bahin sang lawas sang biktima.
Sunod sini nga ginbuno si Melden, nga napilasan naman sa tiyan.
Gilayon naman nga nagpalagyo ang iban pa nga mga utod sang mga biktima.
Si Meldib ang ginrescue pa sang iya magulang nga si Alyas Melmart, samtang si Melden ang nagpangayo naman sang tabang sa kaingod balay, nga nagdala sa iya sa Rural Health Unit sang banwa.
Matapos ang krimen, ang suspect ang nagpauli sa iya nga balay, pila ka metros lamang ang kalayuon sa balay sang iya amay, kag ini ang naabtan na lamang sang kapulisan sa sulod sang balay nga nagab*tay gamit ang kalat sang duyan kag wala na sang kabuhi.
Sa imbestigasyon, wala nagahangpanay ang suspect kag ang iya asawa, kag gina-alegar luyag na nga makigbulag sa iya ang asawa tubtob nga ini ang nagtrabaho bilang timbang.
Ang asawa ang nagapadala na lamang sang sustento sa duha nila ka kabataan.
Gina-alegar nga masami na nga mag-inom ang suspect, tubtob nga ini ang nagahallucinate na.
Suno kay Dagami, may-ara sang hitabo nga luyag sang suspect nga maghulam sang cellphone sang iya hinablos agud mag-video call sa iya asawa, apang siya ang wala ginpahulam.
