3 patay, bangod sa Hanta Virus sa Venezuela

Patay ang tatlo ka indibidwal matapos makumpirmar nga naigo sang hantavirus sa nasidlangan nga bahin sang Anzoategui state sa Venezuela, suno sa Ministry of Health sang pungsod.

Ginpahayag sang health ministry nga duha pa ka reported death sang mga health workers sa Barinas state ang padayon pa nga ginaimbestigaran kag wala sang kaangtanan sa mga kaso sa Anzoategui.

Suno sa mga otoridad, ang hantavirus ang naggikan sa mga ilaga, ilabi na sa mga nabukid nga mga lugar.

Mahimo malatnan ang isa ka tawo paagi sa paghaklo sang mga particle halin sa ihi, higko, ukon laway sang mga ilaga sa mga enclosed spaces.

Ginpaathag naman sang health ministry nga wala pa sang siyentipiko nga ebidensya ang person-to-person transmission sang virus sa Venezuela.