Malapit nalang nga mapanagtag ang libre nga school bag kag school supplies sa mga Bacolodnon nga estudyante sang Negros Occidental High School.
Sa interview kay Bacolod City Mayor Greg Gasataya, natapos na ang ila nga preparasyon kag procurement, gani ginahulat na lamang nila nga madeliver na ang mga school bags kag school supplies.
Pag-abot sang supplies, sila ang derekta na nga magadeliver sa NOHS agud mahatagan ang masobra 9,000 nga Bacolodnon nga naga-eskwela sa nasambit nga buluthuan.
Pahayag ni Mayor Greg nga natapos na ang paghatag sang school supplies gikan sa Kinder Garten tubtob Grade 12 sa idalom sang Department of Education (DepEd) Division of Bacolod City.
Apang pila ka mga Bacolodnon nga estudyante sa NOHS, nga yara sa idalom sang DepEd Negros Occidental ang nagmensahe sa alkalde nga luyag man nila kuntani makabatun sang bulig gikan sa ciudad.
Apang indi kaangay sa ginpanagtag nga School Bags kag PE Uniforms sa mga high school students sa DepEd Bacolod, school bags kag school supplies na lamang ang ihatag sa mga estudyante sa NOHS bangod lain ang ila nga PE uniform.
Pasalig ni Mayor Greg nga ang tikang sang Bacolod City Government ang indi pag-interfere sa pamalakad sang Provincial Government sang Negros Occidental.
Nahibaluan nga mayorya sa mga estudyante sang NOHS, nga nahamtang sa Bacolod City, ang mga residente man sa ciudad.
Apang ang pondo ang indi gikan sa Special Education Fund bangod ini ang para lamang sa DepEd Bacolod, sa baylo ang pondo nga gingamit ang gikan mismo sa Bacolod City Goverment.
Nagrequest na si Mayor Greg sa DepEd Bacolod nga magkoordinar sa principal sang NOHS para sa distribusyon.
