Gintay-og sang magnitude 7.1 nga linog ang nabagatnan nga bahin sang Kyushu, Japan kahapon, nga nagtuga sang pagkawasak sang pila ka mga establisyemento kag pagsaka sang numero sang mga pilason.
Narumpag ang ikaduha nga panalgan sang Aeon Mall shopping center, sa Kashima Town, kun sa diin apat ka indibidwal ang ginluwas nga may mga injuries kag gindala sa ospital samtang napulo naman ang missing.
Sa may bahin naman sang Yatsushiro, natiphag ang dako nga chimney sang Nippon Paper Industries Co. factory, sa diin onse ka tawo ang gin-report nga na-trap sa mga debris.
Duha sa ila ang nasapwan nga wala sang vital signs samtang wala pa nahibaluan ang kondisyon sang siyam ka iban pa.
Nagpagwa naman sang tsunami advisory para sa pila ka mga baybayon sang Kumamoto kag kalapit nga prefectures, apang gin-lift man ini makaligad ang duha ka oras.
Masobra 260,000 ka residente ang gin-abisohan nga magbakwit, samtang may mga reports man sang pagkaguba sang pila ka mga kalsada, mga istraktura, mga taytay, kasubong man sang power outages kag sunog.
