Indi magnubo sa lima ka indibidwal ang nautas ang kabuhi samtang 41 naman ang na-record nga missing matapos masunog ang isa ka depampasahero nga ferry nga may sakay nga kapin sa 250 ka tawo samtang nagabyahe sa katubigan malapit sa isla sang Madura, Indonesia.
Suno sa Indonesian National Search and Rescue Agency ukon Basarnas, gin-report sang kapitan sang barko nga KMP Mutiara Sentosa 2 ang sunog samtang nagapadulong sa Makassar, South Sulawesi naggikan sa Surabaya sa East Java.
Santo sa Basarnas, alas-8:24 sang aga sang nakabaton sang report ang Surabaya Search and Rescue Office natuhoy sa insidente.
Ginabanta nag-umpisa ang sunog sa tunga sang alas-6:00 kag alas-7:00 sang aga, base sa impormasyon naggikan sa kompaniya sang barko.
Makita sa nagalapta nga video sa social media nga nagaginutok ang mga pasahero sa mga lifeboat samtang naka-life jacket.
Sa iban pa nga mga kuha, makita man nga halos natabunan na sang madamol nga aso kag kalayo ang dako nga bahin sang ferry samtang ang pila ka mga pasahero ang napilitan nga maglumpat sa dagat agud maluwas.
Dugang pa sang Basarnas, halos gintupok na sang kalayo ang bug-os nga barko kag madamo na sang pasahero ang nagpabilin sa taytay kag naunhan nga bahin sang barko samtang ginahulat ang pag-abot sang mga rescuer.
Padayon naman nga ginapatigayon ang search and rescue operations agud mapangita ang mga nadula nga pasahero kasubong man ang imbestigasyon sang mga otoridad samtang wala pa matumod ang gintunaan sang kalayo.
