Duha ka firefighting helicopter ang nagbungguanay samtang yara sa operasyon sa pagpalong sang kalayo sa isa ka dako nga wildfire sa Greece sang Dominggo, Agosto 2.
Nagluntad ang insidente sa lugar sang Psatha sa rehiyon sang Attica.
Santo sa fire service sang Greece, duha ka indibidwal ang ginbawian sang kabuhi naggikan sa isa ka helicopter, lakip diri ang isa ka Greek kag isa ka Danish national.
Samtang, nakaluwas naman ang duha ka mga myembro sang crew sang isa pa ka helicopter.
Padayon pa ang imbestigasyon sang mga otoridad sa ginhalinan sang pagbungguanay.
Sa pihak nga bahin, masobra 100 ka mga pamalay na ang naguba sang nasambit nga wildfire sa northwest nga bahin sang Athens samtang nagbakwit naman ang mga residente sa isa pa ka sunog sa isa ka tourist island sang Kefalonia.
Nagapabilin nga malala ang sitwasyon sang wildfire sa Europe sini nga tag-init bangud sa heatwaves kag kakulangan sang ulan, nga santo sa mga eksperto ang ginpalala pa gid sang climate change.
Duha naman ka Greek national ang gin-aresto bangud ginaalegar nagpabaya angot sa insidente, samtang padayon naman nga ginapangita ang isa pa ka suspek.
