Wala sang anuman nga impormasyon nga nakuha ang Department of Interior and Local Government (DILG) kag Department of Justice (DOJ) nga gin-alegar naaresto na si Senator Ronald “Bato” Dela Rosa.
Kasunod ini sang nagalapta nga balita kahapon sang Martes nga nadakpan na ang anay Philippine National Police (PNP) chief.
Una na nga ginpahayag ni DOJ spokesperson Atty. Polo Martinez nga indi sini makumpirmar nga may natabo nga pag-aresto.
Nanindugan man ang DILG nga wala impormasyon naggikan sa PNP nga naaresto na si Bato.
Nagapangatubang sang kaso nga crimes against humanity si Dela Rosa sa International Criminal Court (ICC) may kaangtanan sa war on drugs sang nakaligad nga administrasyon.
Ulihi nga nakita sa publiko ang Senador sadtong Mayo 12 sang ini ang nagtambong sa sesyon sang Senado.
