71 anyos nga lalaki, ginkilala nga “Usain Bolt” ukon pinakamadasig sa patag sang paglimpyo sang binta ukon window cleaning

Ginpamatud-an sang isa ka 71-anyos nga professional window cleaner nga ang pagpanglimpyo sang bintana indi lamang simple nga buluhaton, ini ang nagakinahanglan man sang grabe nga pag-ensayo kag disiplina

Si Terry Burrows, nga ginkilala bilang “Usain Bolt” sa patag sang window cleaning, ang nagapabilin nga isa sa mga pinakamaayo nga partisipante sa World Window Cleaning World Cup.

Suno sa iya, indi supisyente ang regular nga ihibalo sa paggamit sang squeegee agud maka-compete sa mga talentado nga propesyonal sa window cleaning.

Suno kay Burrows, indi mahimo nga masarangan sang iban nga tawo ang iya abilidad, bangud nagakinahanglan ini sang preparasyon kag training.

Sang 2009, naka-record si Burrows sang world record matapos sini malimpyohan sang wala sang nabilin nga higko ang tatlo ka bintana nga may takos nga 45 by 45 inches sa sulod lamang sang 9.14 ka segundo.

Tubtob sa karon wala pa gihapon sang nakatupong ukon nakalapaw sa iya nga record.

Samtang, sa World Window Cleaning World Cup, ang tagsa ka player ang ginahatagan sang palarehos nga kagamitan agud mangin patas ang hampang.

Ang katuyuan sang mga contestant amo ang limpyohan ang tatlo ka bintana sa pinakamadasig kag pinakamalimpyo nga pamaagi.

Hugot naman nga ginabantayan sang tatlo ka judges ang tagsa ka window cleaner.

Ang madaug ang makakuha sang 1,000 british pound ukon masobra P92,000 nga premyo.