Natigayon nga ma-intercept sang kapulisan ang masobra P15 million nga balor sang smuggled nga sigarilyo sa Port area sang Brgy Looc, Dumaguete City, Negros Oriental kagab-i.
Samtang arestado naman ang tatlo ka persona nga ginlakipan sang driver sang canter truck nga si Alias Je, 32 anyos, lalaki, single, residente sang Brgy Tuburan, Pagadian City, Zamboanga del Sur; Alias Jo, pasahero, 22 anyos, lalaki, single, kag residente sang Brgy Bulatok, Pagadian City, Zamboanga del Sur; kag Alias Al, pasahero, 27 anyos, lalaki, single, residente sang Brgy Alu layag layag, Parang, Sulu.
Ang joint operation ang ginpangunahan sang Provincial Intelligence Unit kag Provincial Drug Enforcement Unit sang Negros Oriental Police Provincial Office, kag nagkoordinar sa Police Regional Office – Negros Island Region.
Ini matapos makabatun sang intelligence information nga may ginabyahe nga smuggled nga sigarilyo nga nakarga sa green nga canter truck paagi sa RoRo vessel nga gikan sa Pagadian City padulong sa Dumaguete City.
Nakumpiskar sa operasyon ang 68 ka master cases sang Walter Premium Cigarettes, 195 ka master cases sang Busqu Full Flavor Cigarettes; ang green nga canter truck nga ginkargahan; kag kapin 200 ka karton sang uga nga tabagak nga ginabanta balor P90,000.
Sa kabug-usan, nagdangat sa 263 master cases sang illicit cigarettes ang narecover nga ginabanta balor P15,069,900.
