Magapatigayon sang entrance examination ang Philippine Military Academy subong nga adlaw Agosto 8 tubtob bwas Agosto 9 sa Bacolod City College Activity Center sa Brgy Taculing, Bacolod City.
Sa interview sang Bombo Radyo Bacolod kay Lt Col Eric Alfonso, commander sang 79th Infantry Battalion sang Philippine Army, sila ang may-ara sang online application, apang pwede gid nga makakuha sang entrance exam ang walk-in.
Ang processing ang nag-umpisa alas-7:00 subong nga aga, kag ang exam ang patigayunon alas-12:00 karun sa udto.
Panugyan sini sa mga luyag magwalk-in nga magdala sang birth certificate kag diploma.
May ara naman sang qualifications sa mga applicants.
Suno kay Alfonso, ang applicant ang dapat nga natural born citizen, 17 anyos tubtob 22 anyos, single, wala sang bata, graduate sang at least Grade 12 Senior High School, may average grade nga 85 pasaka, kag 5 feet tubtob 6-foot-4 ang kataason.
