Gina-imbestigaran subong sang Office of the Ombudsman ang implementasyon sang mga flood control projects sa Cebu nga nagabalor P60 billion sa nakaligad nga anum ka tuig.
Suno kay Ombudsman Jesus Crispin Remulla, ginpatigayon ang imbestigasyon kadungan sang pag-inspect sa mga flood control projects sa Cebu.
Base sa ila inisyal nga imbestigasyon, dako nga bahin sang P60 billion ang nagkadto sa ikapito nga distrito, samtang ginabanta sa 25 percent ang nagkadto sa nagapanguna nga contractor nga Quirante.
Ginpahayag ni Remulla nga dako na dapat ang nangin epekto sang nasambit nga pondo sa pagkontrol sang baha.
Apang, nakaeksperyensya gihapon sang pagbaha ang Cebu sang tinalikdan nga bulan, rason kun ngaa nagpatigayon sang inspection ang Ombudsman.
Suno kay Remulla, posible nga may iregularidad sa mga flood control projects nga indi gilayon makita sa una nga paglantaw kaangay na lamang sang paggamit sang sheet piles nga mahimo mas lip-ot sangsa gintalana nga standard.
Gina-usisa pa sa karon sang Ombudsman kun ang mga problema ang bangud sa disenyo sang proyekto, sa mismo nga pagpatuman sini, ukon may kaangtanan sa korapsyon.
