Ginmando sang Department of Public Works and Highways nga imbestigaran ang pila ka mga flood control kag road projects sa Bacolod City nga ginrekomendar sang Council of Concerned Citizens (C3) sang Oktubre 29, 2025.
Sa interview sang Bombo Radyo Bacolod kay Atty Renecito Novero, ginakalipay sini nga nabukaran gid man ang letter nga ila ginpadala napulo ka bulan na ang nakaligad, nga suporta kuntani sa imbestigasyon sang Independent Commission for Infrastructure (ICI).
Ang letter ang ginpadala ni DPWH Undersecretary for Legal Services Atty Samuel Rufino Turgano kay DPWH Negros Island Region officer-in-charge Regional Director Engr Jose Al Fruto sa iya opisina sa Amlan, Negros Oriental.
Suno kay Novero, ang ila investigation report ang ginsumiter nila sa ICI, DPWH, kasubong man sa Senate Blue Ribbon Committee.
Pahayag sini nga sila ang may mga listahan sang mga flood control projects kag iban sa mga ini ang ila nga ginbisitahan.
Pahayag sini nga nangin madamol ang ila ginsumiter nga dokumento bangod nalakip diri ang mga nakitaan nila sang anomalya matapos ang pagbisita, mga issue sa dokumento, kag mga litrato sang actual project.
Apang bangod DPWH gihapon ang maga-imbestigar sa mga proyekto nga iya man sang ahensya, pangabay sini nga magdeputize sang civic minded individuals kag mga professionals nga may technical expertise nga maga-upod sa inspection.
Ini agud malikawan ang ‘white washing’ ukon pagtabon sa sala.
Hangkat sini sunod sa pahayag ni President Ferdinand Marcos Jr nga “Mahiya naman kayo” sa iya nga 2025 State of the Nation Address, nga tugutan ang voluntary contributions sang civic minded individuals kag mga professionals nga may technical expertise para maseguro ang impartiality sa imbestigasyon batok sa flood control anomalies.
