Ginbalik na sang Punong Brgy sang Brgy Tomina, banwa sang Cauayan ang tig P20,000 nga Presidential Scholarship grant nga nabatun sang iya duha ka bata.
Madumduman nga ginbatikos sa social media si Punong Brgy Evelyn Robles sang Barangay Tomina, Cauyan matapos ginpasulod ang iya duha ka bata sa Presidential Scholarship grant.
Sa interview sang Bombo Radyo kay Richard Julius Sablan, Presidente sang Liga ng mga Barangay – Negros Occidental Chapter, ginpahayag sini nga sa personal nila nga pagpadulong sa brgy Tomina, nakita niya nga dutay gid man ang 4th year student sa lugar bangud tuman na ka nabukid ang lugar.
Sa pihak sina, suno kay Sablan, gintungahaan nila nga makakita sang kwalipikado nga ibulos sa duha ka bata sang Punong Brgy.
Suno diri, matapos mauli ang P40,000, insigida man nga ginhatag sa bag-o nga scholar ang tig P20,000.
Ginpanas man ang pangalan sang duha ka bata ni Robles.
Ginkumpirmar man sini nga may bag-o naman nga report sa pareho nga reklamo sa Brgy Robles, banwa sang La Castellana kag sa Brgy Balikutok, sa Ilog kun sa diin ang isa ka bata sang brgy Kagawad kag Purok Chiarman ang ginpasulod man sa amo nga Scholarship.
Suno kay Sablan, sa mga masunod nga adlaw, bisitahon niya ang mga brgy nga may mga complaint bangud suno diri, indi pwede nga ini ang pabay-an lang.
Pahayag sini, na-intindihan niya nga indi tanan nga Punong Brgy ang may ikasarang sa pangabuhi apang dapat ikonsiderar man nga indi pag-ilakip ang miyembro sang pamilya agud wala na sang isyu sa baylo unahon nalang ang mag constituents.
