Patay ang driver sang motorsiklo samtang pilason naman ang iya nga angkas matapos nga nakabunggo sa karabaw sa Hacienda Sto. Rosario, Brgy. Guimbalaon, Silay City, Negros Occidental, Domingo sang kaagahon, Agusto 23.
Suno kay Police Lt. Col. Edison Garcia, hepe sang Silay City Police Station, padulong sa proper sang Guimbalaon ang mga biktima kag pag-abot nila sa lugar, nakabunggo sila sa karabaw nga yara sa tunga sang dalan.
Ang karabaw ang nakabuhi sa iya nga lawig kag nagsungayay sila sang isa man ka karabaw.
Bangud sa impact sang pagbunggo, nahulog sa motorsiklo ang driver nga si alyas Adrian sang Brgy. Kapitan Ramon, Silay City kag iya angkas nga si alyas Janjan sang Sitio Sibato, Brgy. Guimbalaon, Silay City.
Dead on arrival sa ospital si Adrian samtang ginabulong pa si Janjan.
Suno kay Garcia, ila pa nga lantawon kun ano ang salabton sang 60-anyos nga mangunguma nga tag-iya sang karabaw.
Nagpanugyan naman ang hepe sa mga motorista nga hinay lang sa pagpadalagan agud indi mabutang sa peligro.
