Ginbawian sang kabuhi ang isa ka anum ka tuig nga bata nga lalaki sa Visakhapatnam, India matapos gin-alegar gintampa sang iya manunudlo samtang yara sa klase sang Biyernes, Agosto 21, santo sa mga otoridad.
Base sa mga report, nagpangakig ang teacher matapos matukiban nga kulang ang assignment sang bata.
Sa kuha sang CCTV, makita nga ginpapalapit sang maestra ang estudyante, ginbutong ang kwelyo sang iya uniporme, kag hinali nga gintampa ang bata.
Samtang nagatindog sa atubangan sang maestra, gulpyada lang nga natumba ang bata.
Gilayon ini nga gindala sa ospital apang wala na ini natabangan pa.
Suno sa amay sini, maayo gid ang kondisyon sang ikaayong lawas sang iya bata sang nagsulod ini sa skwelahan kag wala man sang may ginabatyag nga anuman nga balatian.
Nagapati ang pamilya nga may kaangtanan ang pagtampa sa kamatayon sang bata, apang wala pa napagwa sang otoridad ang eksakto nga gintunaan sang pagtaliwan sini.
Wala man gilayon nakuha sang mga himata ang bangkay bangud ginpaidalom pa ini sa eksaminasyon.
Padayon ang imbestigasyon sang mga otoridad sa insidente, kalakip ang mga hitabo antes kag tapos madulaan sang animo ang bata.
