Ginpahayag sang Department of Energy (DOE) nga indi pa posible nga mauntat sang lubos ang system loss charges antes ukon sa tion sang katapusan nga State of the Nation Address ni President Ferdinand Marcos Jr. sa masunod nga tuig.
Apang nagpain ang gobyerno sang P7.5 billion nga programa agud nga amat-amat madula ang non-technical system losses sa balayran sang kuryente.
Ini ang mahimo makabuhin sa balayran sa kuryente sang 4 percent ilabi na sa mga konsumidor nga ginserbisyuhan sang electric cooperatives.
Ang system loss amo ang kuryente nga nadula antes ini makaabot sa mga konsumidor, kag ang gasto sini ginapabayran sa mga consumers paagi sa electric bill.
Ang system loss ang may duha ka klase nga ginalakipan sang technical losses, nga natural nga pagkawala sang kuryente samtang nagaagi ini sa mga linya, kag non-technical losses nga resulta sang illegal connections.
Sa programa ang gobyerno ang magapokus sa pagtapna sang ilegal nga pagkabit kag pagpangawat sang kuryente, edukasyon sang mga konsumidor, mas maayo nga billing kag collection, pagdumala kag pag-audit sang mga metro, paglimpyo sang consumer database, pagpalig-on sang mga institusyon, kag pagbag-o sang mga polisa kag regulasyon.
