Gintalana sang Barangay Bata, Bacolod City ang ila nga P100,000 cash grant gikan sa Bawat Barangay Makikinabang (BBM) Program sang Office of the President para sa pagbakal sang canopy kag monoblock chairs agud indi na mag-arkila kun may-ara sang mga events.
Sa interview sang Bombo Radyo Bacolod kay Punong Barangay Remus Abaring, antes magdesisyon, gindiskusyunan nila mismo sa Barangay Council kun ano ang paboran sang mayorya nga gamitan sang pondo.
Nakasugtan sang tanan nga italana na lamang ini sa pagbakal sang canopy kag monoblock chairs bangod sa tion nga may mga event sa Barangay Bata, kaangay sa fiesta sang purok, sila ang nagarenta pa sang duha tubtob tatlo ka canopy kag mga bangko, nga mahal kag gastos para sa Barangay.
Para sa iya, mapuslan gid ini bangod luwas sa mga events sang Barangay, may mga tion man nga nagahulam ang mga pumuluyo kun may ara sang mga aktibidad, kasubong man sa haya sa patay.
Ang budget ang ila tungaon kun sa diin ang P50,000 ang para sa canopy kag ang nabilin nga P50,000 ang para naman sa mga pulungkuan.
Samtang ginpaagi naman nila sa raffle kag ginlivestream ang pagpili sang lima ka Presidential Scholars.
Madumduman nga sa P200,000 cash grant sa BBM Program, ang P100,000 ang para sa Barangay project, samtang ang P100,000 ang tungaon naman sang lima ka presidential scholars nga magabatun sang tig-P20,000.
Agud patas ang pagpili, gin-anunsyar nila sa facebook page sang Barangay ang programa, kag gin-engganyo nga magcomment ang mga graduating college students.
Apang suno kay Abaring, nagdangat sa masobra 190 ang nagpalista sang ila pangalan.
Wala naman sang himata sang Barangay officials nga nalakip sa listahan.
Ginlivestream man nila ang draw, kun sa diin may isa pa nga nadisqualify bangod ini ang 3rd year college student pa lamang, gani sila ang liwat nga nagpili sang ibulos.
Madinalag-on naman ang raffle kag natabuan nga gikan man sa lainlain nga eskwelahan ang nangin Presidential scholars.
