Ginpasanyog pa sang Bacolod Traffic and Transport Management Department (BTTMD) ang pagpanakop sang mga colorum nga public transportation sa ciudad sang Bacolod.
Sang tinalikdan lamang gin-impound ang 15 ka colorum tricycle, lima ka e-bike, kag duha ka motorsiklo bangod sa nagkalainlain nga violations sa Brgy Sum-ag, Bacolod City.
Sa interview sang Bombo Radyo Bacolod kay Atty Reuben Sabig, officer in charge sang BTTMD, malawig na ang ginhatag nila nga tyansa para magproseso ang mga ini sang permits sa ciudad, apang manug-takop na ang tuig madamo pagid gihapon ang wala nagasunod.
Kalabanan sa ila nga operar ang mga nagabyahe sa tabok sa border sang Bacolod City kag Bago City.
Suno kay Sabig, wala na nila ginatsekyar kun may permit ukon prangkisa sa Bago City, apang ang importante lamang sa ila nga nakaparenew sang permit sa Bacolod City.
Madamo man sa mga gindakop ang miyembro sang Tricycle Operators and Drivers Association.
Suno diri, sa 200 plus nga members sang TODA sa area, natukiban nga 75 lamang ang nakakuha sang permit, bangod madamo sang wala nakarenew sang prangkisa.
Pahanumdom niya nga apisar ini ang ginadiskusyonan na sa konseho, sila ang magapanakop gihapon sang mga nagabyahe nga wala nakarenew, bangod sila ang makonsiderar nga colorum.
Indi man pwede nga ipresentar ang 2025 permit, bangod ini ang expired na.
Pahanumdom ni Sabig, “kun wala nakarenew, colorum gani indi magbyahe.”
