Nagapati si PDP Deputy Secretary General for Visayas Atty Jayvee Hinlo nga si Col. Dante Lachica, chief security officer sang Office of the President ang kinahanglan mapa-atubang sa Impeachment trial agud matumod kun may-ara gid man sang bayolasyon sa disbursement sang confidential funds.
Madumduman nga si Lachica ang gintudlo nanday OVP Assistant Secretary Lemuel Ortonio kag Special Disbursing Officer Gina Acost nga amo ang gindahuan sang kwarta matapos ma-encash.
Sa interview sang Bombo Radyo Bacolod kay Hinlo, ang pagtestigo ni Lachica ang mahimo makahatag sang kasanagan kun paano gingastos ang confidential funds ukon kung may paglapas sa Commission on Audit circular.
Apang kun indi ipresentar sang prosekusyon si Lachica bilang hostile witness, ini ang mahimo man nga ipresentar sang defense counsel, ukon mismo sang Senator-judges.
Paathag ni Lachica nga apisar makita nga may paglapas sa COA circular, wala nagakahulugan nga ini ang impeachable offense na, luwas nalang kun mapamatud-an nga ginbulsa sang opisyal ang pondo.
Apang ang desisyon ang magabase naman sa paglantaw sang mga Senator-judges.
Sa pihak nga bahin, wala naman sang problema sa paggamit sang mga terminolohiya kaangay sang “scam,” kun ini ang ginagamit para sa paghibalo sang kamatuoran.
Apang kun ang pamangkot ang may tinutuyo na nga pakahuy-an ang witness ukon respondent, sila ang pwede naman nga icall-out sang presiding officer.
Sa pihak sini ginalantaw ni Hinlo nga ginalikawan ni Senator Chiz Escudero nga dal-on ang reklamo sa mga salawayon nga mga Senator judges sa ethics committee.
Ini bangod ang kaso ang desisyonan ukon botohan gihapon sang mga Senador sa komitiba, kag aminado man ini nga may mga pag-apinay sa mayorya sang mga senador.
