Ginkalipay sang Bacolod Alliance of Commuters, Operators, and Drivers (BACOD) Manibela nga narenew ang Provisional Authority (PA) sang mga unconsolidated traditional jeepney sa sur nga bahin sang probinsya sang Negros Occidental.
Sa interview sang Bombo Radyo kay Rudy Catedral, Presidente sang BACOD Manibela, ginpahayag sini nga lakip sa ginhatagan sang Provisional Authority ang mga traditional jeepney operators sa Cauayan, Kabankalan, Hinoba-an kag Sipalay.
Suno kay Catedral, ang PA ang balido sa sulod sang isa ka tuig sumugod subong nga Agosto kag mahimo liwat ma-renew sa masunod nga tuig.
Ginpahayag ni Catedral nga kabahin ini sa resulta sang pagpakigsapol ni LTFRB Chairman Vigor Mendoza sa mga traditional jeepney kag modernized jeepney sa ciudad sang Bacolod sang tinalikdan nga mga semana, nga isa sa ila ginaduso.
Ginpasalamatan sini si Board Member kag Acting Chairman sang Land Transportation Franchising and Regulatory Board (LTFRB) Atty. Greg G. Pua Jr. nga ginpadayon ang ginpromisa ni Mendoza apisar nga ini ang ginsuspend.
Dugang pa Catedral, sa Setyembre 5 kag 6, may patigayunon nga general assembly sa Manila kag isa siya sa mangin repsresentante kag ayu-on sini ang National LTFRB nga unahon ang ginpromisa ni Mendoza sa ila.
Sa pihak sini, pahayag ni Catedral nga naga-antos sa gihapon ang mga traditional jeepney drivers sa padayon nga pagsaka sa presyo sang gatong.
Gani, panawagan sini nga ang P20,000 nga assistance nga ginaduso ang matigayon nga mahatag sa ila nga suno sa iya mangin dako na nga bulig para sa ila.
