Tatlo ang pilason matapos ang pagpangluthang sa bahin sang Osmeña Street, Barangay 2, Hinigaran, pasado alas-11:00 ang takna kahapon sang aga, Agosto 30.
Ginkilala nga sanday Marie, 37-anyos; Choy, 64-anyos; kag isa ka menor de edad nga lalaki, nga lunsay residente sang amo nga lugar nga yara na sa karun sa estable nga kondisyon.
Ang suspek naman ginkilala nga si Chester Bernard Gonzalo, 52-anyos, isa ka Job Order employee sang Municipal Water District kag residente sang Barangay Gargato, Hinigaran.
Sa interview sang Bombo Radyo Bacolod kay Police Lt Col Jovil Sedel, hepe sang Hinigaran Municipal Police Station, sa ila ginpatigayon nga imbestigasyon magpamilya ang mga biktima.
Suno kay Sedel may mga daan na nga hiligut-anon ang magtimbang nga bahin kun sa diin gin-ayo sang suspek nga idugon sang isa sa biktim ang naga-park sini nga salakyan.
Ini ang ginhalinan sang indi paghangpanay rason nga nagkadto ang suspek sa iya salakyan, nagkuha sang armas-luthang, kag nagpalupok sang makapila ka beses.
Nakaangkon sang pilas sa natuo nga hawak si Marie, samtang pilas sa natuo nga paa ang naangkon ni Choy.
Ang menor de edad naman ang nakaangkon sang pilas sa nawala nga tikod.
Sa karun, padayun nga nagapaayo ang mga biktima.
Suno sa hepe narekober sa crime scene ang isa ka unit sang .45 caliber pistol, pito ka fired cartridge cases sang caliber .45, duha ka magazine, kag pito ka bala.
Priso na sa karun ang suspek kag natalana nga magapangatubang sang kaso nga three counts nga frusrtrated kag attempted homicide.
