Ginkwestyon sang mga estudyante sang Pamantasan ng Lungsod ng Maynila (PLM) ang desisyon sang Board of Regents nga hatagan sang honorary Doctor of Laws degree si President Ferdinand Marcos Jr.
Sa isa ka joint statement sang PLM Supreme Student Council kag 33 ka iban pa nga mga student council kag organisasyon, ginpahayag diri nga wala sila ginkonsulta nahanungod sa pagkilala sa presidente, nga mahimo makabig ini nga isa ka pag-endorso sa administrasyon ni Marcos, nga nagapangatubang sang mga isyu nahanungod sa transparency, accountability, kag human rights.
Ginpaathag sang mga estudyante nga dapat may yara sang mataas nga talaksan sa paghatag sang isa ka honorary degree.
Ginhinambit man nila ang history sang PLM kag ang handumanan ni Liliosa Hilao, isa ka university student journalist nga napatay samtang yara sa detention sang panahon sang Martial Law sa idalum sang administrasyon ni anay President Ferdinand Marcos Sr.
Si Marcos Jr. ang ginhatagan sang honorary Doctor of Laws degree sang PLM sang Agosto 27 bilang pagkilala sa iya suporta sa mga proyekto sang eskwelahan, lakip na ang pagtukod sang PLM Medicine and Allied Sciences Building.
Samtang, nagpangayo man sang paathag ang PLM College of Law Student Council kun bala ginsunod ang standards sang Legal Education Board sa paghatag sang honorary degree.
Partikular nila nga ginkwestyon kun bala nakalab-ot si Marcos sa requirement nga dapat may baccalaureate degree ukon katumbas sini gikan sa isa ka kilala nga institusyon.
