1,632 ka police personnel ang gindeploy sa bilog nga Negros Island Region sa pagseguro sang safe nga mga aktibidad may kaangtanan sa pagdumdom sa National Heroes Day subong nga adlaw, Agosto 31, 2026.
Sa interview sang Bombo Radyo Bacolod kay Police Regional Office – Negros Island Region Spokesperson Police Lt Col Joem Malong, ang mga kapulisan ang magahatag sang seguridad, maga-assist sa publiko, sa pagmanage sang traffic, kag pagresponder sa ano man nga sitwasyon nga mahimo magluntad.
Kalakip diri ang pagbantay sa mahimo pagpatigayon sang mga rally sang pila ka grupo para sa pagpanawagan kag pagpa-utwas sa gobyerno sang ila kalain sang buot.
Kalakip sa deployment ang para sa police visibility, fixed patrol, mobile patrol, motorcycle patrol, foot patrol, traffic assistance, checkpoint operations, border control, civil disturbance management, reactionary standby support force, kag iban pa nga law enforcement functions.
Luwas sa kapulisan, magabulig man sa pagpabilin sang seguridad ang personnel gikan sa 14 ka iban pa nga uniformed units, kag 311 ka force multipliers.
Magahamtang man sang mga personnel sa mga major thoroughfares, transportation hubs, public places, memorial sites, kag iban pa nga strategic locations.
Ang PRO-NIR ang may close coordination man sa mga Local Government Units, para sa unified approach para sa pagseguro sang responsive nga security presence antes tubtob matapos ang okasyon.
Panawagan naman ni Malong sa mga pumuluyo, nga kun may mamutikan nga kamalamalahan, gilayon nga ireport sa 911.
Samtang wala naman sang ginpatigayon nga aktibidad sa ciudad sang Bacolod subong nga adlaw may kaangtanan sa National Heroes Day.
