Ginpahayag sang General Manager sang Central Negros Electric Cooperative (CENECO) nga yara sa 97 porysento ang pagnubo sang power outages sang Negros Electric and Power Corporation (NEPC) sa ciudad sang Bacolod kag sa bilog nga franchise area.
Sa interview sang Atty Arnel Lapore, wala na sang distribution services ang CENECO apang sila ang nagadumala sa gihapon sa mga nabilin nga assets sang kooperatiba.
Suno diri, may 12 pa sila ka empleyado kag pito diri ang board of directors.
Sa pihak nga bahin, ginpaathag ni Lapore nga indi dapat basulon ang Negros Power sa mga nagakatabo nga rotational brown out bangud suno diri, ang transmission grid kag power supply ang responsibilidad sang National Grid Corporation of the Philippines (NGCP) sa bahin sang transmission system.
Dugang pa, ang mannual low dropping ukon yellow kag red alert sa supply sang kuryente ang nagaeksperyensyahan indi lamang sa Visayas kundi kasubong man sa bilong nga Pilipinas nga suno sa iya, dapat hatagan sang pagtamod sang gobyerno.
Sa subong, suno kay Lapore nga kun nagasaka ang demand sa kuryente apang kulang ang supply, indi malikawan nga magsaka man ang rate sang kuryente.
Sa pihak sini, suno sa general manager nga dako man ang bulig sa amat-amat nga pag-ilis sang mga poste ukon rehabilitation agud sa tion sang kalamidad indi na malawig ang nagakaeksperyensyahan nga power outage.
Pahayag sini nga naghagan-hagan na ang power outages sa pagdumala sang Negros Power kag ginpaathag nga kun sakto lang ang supply sang kuryente, 24/7 ang operation sang Negros Power, luwas lang kun may kinahanglanon nga kay-ohon sa linya.
