Pahayag sang National Grid Corporation of the Philippines (NGCP) – Visayas nga luwas sa mga una na nga power plants nga nagpahayag sang scheduled maintenance, may duha pa ka dalagko nga coal-fired power plant sa Iloilo nag hinali nga nadula sa grid rasun sang paglala sang red alert status.
Sa interview sang Bombo Radyo Bacolod kay Michelle Visera, Regional Corporate Communication Officer sang NGCP – Visayas, sa NGCP Advisory alas-8:00 kaina sang aga ang available capacity ang yara nalang sa 2,233 megawatts, samtang ang projected demand ang ginalantaw magadangat sa 2,504 megawatts, ukon kulangon sang 271 megawatts.
Ginklaro man niya nga ang ila advisory ang projection ukon estimates lamang, gani kun kaisa sila ang liwat nagapagwa sang notice angot sa red alert status, nga nakabase na sa real-time data.
Paathag ni Visera nga indi na kinahanglan magnotify sang power plant kun sila ang madula sa linya, bangod ini ang makita na nila sa system.
Kun hinali nga madula sa grid, didto na sila nagarequest sa mga electric cooperative sa pagpatuman sang rotational manual load dropping.
Apang bangod sa mas nagnubo nga power supply, ang anay tig-duha ka oras nga brownout ang pasakaon na sa tig-tatlo ka oras.
Pahayag ni Visera nga sila ang alagyan lamang kag nagamonitor sang capacity kag demand sang kuryente, kag indi makakwestyon sa rasun sang mga power plant sa hinali nga pagkadula sa grid.
Paathag niya nga trabaho sang Department of Energy ang pagpatigayon sang imbestigasyon, samtang ang mapasalig lamang sang NGCP amo ang madasig nga paghaboy sang kuryente kun makabalik na sa linya ang power plants.
Suno diri, ang Visayas Grid ang kun kis-a nagakuha man sang supply sa Mindanao Grid, apang sa karun bisan ang Mindanao Grid ang ginakulang naman sang supply.
