Nagnubo sa $98 billion ang gross international reserves (GIR) sang Pilipinas sa katapusan sang Oktubre samtang nakarekord naman sang $1.5 billion deficit ang overall balance of payments sang pungsod sa nasambit nga bulan suno sa report sang Bangko Sentral ng Pilipinas (BSP) sang Biyernes.
Ginaangot sang BSP ang pagnubo sang foreign reserves sa net foreign exchange operations, pagnubo sang balor sang gold sa world market kag net foreign currency withdrawals sang national government para sa pagbayad sang external debt kag iban pa nga kinahanglan nga pondo.
Sa pihak sang pagnubo, ginpasiguro sang central bank nga magapabilin ang nagakaigi nga reserba agud masabat ang kinahanglano sa pag-import sang pungsod, pagbayad sa mga obligasyon sa external debt, kag magserbe nga panagang batok sa global economic shocks.
Katumbas ang nasambit nga reserba sang 6.1 ka bulan nga balor sang importasyon sang mga produkto kag pagbayad sa mga serbisyo kag primary income kag masarangan nga matabunan ang kapin 3.2 ka beses nga short-term external debt sang pungsod base sa residual maturity.
Samtang, bangud sa $1.5 billion nga BOP deficit sang Oktubre, nagsanyog sang $10.6 billion ang kabug-usan nga deficit sa una nga napulo ka bulan sang 2026 nga mas mataas kun ipaanggid sa S4.6 billion deficit sa pareho nga tion sang nakaligad nga tuig.
Paathag sang BSP, nagakahulagan ang year-to-date deficit sa padayon nga kakulangan sa trading sang mga produkto kag net outflows gikan sa foreign portfolio investments kun sa diin amat-amat nga nasabat sang padayon nga pagsulod sang remittances gikan sa mga overseas Filipino, mga foreign borrowings sang gobyerno, trade in services, kag foreign direct investments.












