Ginkumpirmar sang provincial administrator sang Negros Occidental nga half-day lamang ang trabaho sang mga empleyado sang provincial capitol kasunod sang ginpagwa nga memorandum sang gobernador matapos ang gin-alegar nga pamahog sang pagpaniro kahapon.
Sa interview sang Bombo Radyo Bacolod kay Atty. Rayfrando Diaz, indi dapat ginabalewala ang kaangay nga insidente, ilabi na kun nagtuga sang trauma ukon kahadlok sa mga empleyado.
Suno kay Diaz, gin-review sang administration office ang mga existing procedures kag ginalantaw kun ano ang dapat himuon agud malikawan nga masulit ang kaangay nga sitwasyon.
Suno diri, antes pa man ang insidente ginpangita siya sang nagpamahog nga natumod nga si John Sy Keng Seng bangud may yara ini nga kinahanglanon sa iya apang wala siya.
Ini bangud nagtambong ini sang pag-convene sang Provincial Development Council ukon PDC, upod sa mga concerned offices kag committees, kalakip ang Provincial Anti-Drug Abuse Council kag Provincial Peace and Order Council.
Dugang pa ni Diaz nga wala man sang pending transactions sa tunga sang provincial government kag sa natungdan.
Apisar nga nagpahayag si Keng Seng nga ang transaction ang may kaantanan sa bulkwater wala man sang ginpakita nga official letter ukon receiving copy nga makapamatuod sang isa ka pending official transaction.
Sa pihak sini, ginpahayag man sang administrasyon nga padayon nila nga ginapaayo ang training, teamwork, kag work ethic sang mga empleyado.
Gin-engganyo ang mga staff nga magbuligay kag mag-go the extra mile sa pagserbisyo sa publiko, pero ginpaandaman man nga ang ila pagka-mabuligon indi dapat abusuhon.
Gin-emphasize nga dapat ihatag sa tanan ang outmost respect, kag indi pagpasugtan ang pagpamahog, intimidation, ukon iban pa nga porma sang pag-abuso sa sulod ukon may kaangtanan sa trabaho sang gobyerno.
Samtang gilayon nga nagresponde ang katapo sang Bacolod Police Station 2 sa report nga grave threat.
Sa interview sang Bombo Radyo Bacolod kay Police Major Rondyl Tapang, padayon pa nila nga ginavalidate ang nasambit nga report.
Suno kay Tapang, naestorya man nila ang mga imbulbado nga persona nga direkta nga ginhambalan sang pamahog kag kuhaon man nila ang bahin sang nagpamahog.
Suno kay Tapang, may crime committed kag may yara sang legal repercussion.
Nablotter naman ang nasambit nga report sang grave threat kag kun magpasaka sang kaso ang mga imbulbado nakahanda ang mga kapulisan nga mag-assist.
Gin-athag man sini nga ang babayi nga empleyado nga direkta nga gin-alegar ginpahog ang wala nagpablotter gani gina-engganyo niya ini nga magpa-blotter agud may legal basis sila sa kun ano gid ang natabo.
Ginpahayag man ni Tapang nga wala sang CCTV sa area kun din natabo ang gina-alegar nga pagpamahog gani wala sang recorded.
Padayon sa karun ang imbestigasyon sang mga kapulisan sa nasambit nga insidente.
