Ginpahayag ni Negros Occidental 3rd District Rep. Javier Miguel “Javi” Benitez nga kinahanglan sang Department of Energy (DOE) sang master plan sa pagsolbar sang power crisis sa Visayas.
Suno sa kongresista, kinahanglan may yara sang power planning lakip na ang battery energy storage systems, kasubong man sang nagakaigo nga backup ukon reserve capacity nga mahimo makabulig sa pag-cover sang peak load sa tion nga kulang ang generation.
Ginpahayag man niya nga kinahanglan ma-implementar gilayon ang mga commitment sang DOE.
Suno diri, indi lamang sa Visayas nagaatubang power crisis kundi kasubong man sa Mindanao, kun sa diin may mga power generation facilities nga indi maka-operate, rason nga nagakatabo ang rotational brownout, yellow kag red alert status, kag manual load dropping.
Pahayag ni Benitez, kinahanglan may yara sang representante nga magapalab-ot sang mga concerns sang mga pumuluyo sa National Government, kag dapat ini mahatagan sang gilayon nga solusyon.
Ginpasalig man sang kongresista nga ginapamatian nila ang mga pumuluyo kag ginahimo nila ang tanan agud mahatagan sang tikang ang mga concern sang mga konsumidor.
