Posible nga manaug sa 13 ang kinahanglan nga boto para ma-convict si Vice President Sara Duterte kun 20 ka senador lamang ang legal nga magaserbe bilang senator-judges sa oras nga magpagwa sang verdict ang impeachment court.
Ini ang interpretasyon sang abogado kag professor of Law nga si Howard Calleja, base sa probisyon sang Konstitusyon nga nagakinahanglan sang ‘concurrence of two-thirds of all members of the Senate’ para sa conviction.
Suno kay Calleja, wala nagapabilin sa 16 ukon 24 ang numero sang pagagamiton nga basehan sa pag-isip sang two-thirds.
Sa baylo, mahimo magbag-o ang denominator depende sa kabug-usan nga numero sang mga senador nga legal ukon aktwal nga mahimo ang ila katungdanan bilang senator-judge.
Kun 21 ka mga senator-judges lamang ang aktibo, kinahanglan matumod kun 13 ukon 14 ang katumbas sang two-thirds.
Suno kay Calleja, “moving number” ang voting threshold bangud wala man nakasaysay sa Konstitusyon ang numero nga 16 ukon 24.
Sa karon, nagapabilin nga 16 votes ang conviction threshold base sa nauna nga ruling sang presiding officer sang Impeachment Court, nga amo man ang posisyon sang House prosecution.
Madumduman nga gin-imbitahan ang mga anay mahistrado sang Korte Suprema agud maghatag sang ila opinyon sa interpretasyon sang constitutional requirement antes talakayon sang mga senator-judge ang disputed voting threshold.
