Gin-athag sang project engineer sang footbridge nga nagakonekta sang Barangay Singcang-Airport kag Barangay 35, Bacolod City nga wala sang overpricing sa proyekto.
Sa interview kay Engr. Julio Belleza, wala sang overpriced ukon sobra nga presyo sa proyekto nga footbridge nga nagakonekta sa duha ka barangay.
Kahapon, nagpatigayon sang inspection sa footbridge si Belleza, kaupod sanday Mayor Greg Gasataya, Councilor Caesar Distrito kag Punong Barangay Rosinie Distrito.
Ini kasunod sang mga komento kag pagpakamalaot sang pila ka netizens online nga nagapamangkot sa kantidad sang proyekto.
Suno sa project engineer, ang proyekto ginpatuman suno sa mga standards sang Department of Public Works and Highways ukon DPWH.
Antes ini ginpatukod, kinahanglan pa nga magsakay ang mga residente sa improvised nga balsa agud makatabok sa pihak nga lugar, kag nagabayad sila sang isa ka piso kada pagtabok.
Ginapaabot nga maglawig sang tubtob 20 ka tuig ang bag-o nga footbridge.
Sa Karun ginahanda na ang mga papeles agud ipasa sa Commission on Audit.
