Panawagan sang Water Watch Negros nga bantayan ang dalagan sang ginfile nga graft charges batok sa pamilya Villar angot sa palpak nga operasyon sang PrimeWater Infrastructure Corporation sa nagkalainlain nga bahin sang Pilipinas.
Sa interview sang Bombo Radyo Bacolod kay Water Watch Negros Convenor Wennie Sancho, ini na ang makabig balos ukon hustisya gikan sa malawig nga tinuig nga pag-abuso sang PrimeWater sa mga konsumedor.
Pahanumdom sini nga sa malawig nga tinuig, gingamit sang Pamilya Villar ang water utility nga Piggy Bank, bangod sila ang wala man sang gindagdag nga capital sa negosyo.
Suno kay Sancho, ginkuha lamang sang PrimeWater ang management sang water distribution utility sa ciudad, kag wala man lang sang gingastos para sa rehabilitation sang mga pasilidad para sa mas maayo nga serbisyo.
Panawagan nila ang public disclosure sang kasugtanan sa pagsulod sa joint venture agreement sa tunga sang PrimeWater kag Bacolod City Water District (BACIWA).
Suno diri, dapat man sang public disclosure sa agreement sa Hiraya Water Corporation.
Panindugan ni Sancho nga ginapangita sang mga pumuluyo ang transparency kag accountability.
Nagapati ini nga gamiton sang manggaran nga pamilya ang tanan nga delaying tactics sa ginapangatubang nga kaso.
Gani dapat man nga magpabilin ang pagbantay sang mga pumuluyo sa development, tubtob nga makuha ang hustisya.
