Padayon ang ginapatigayon nga imbestigasyon sang EB Magalona Municipal Police Station, Local Government Unit kag Department of Education sa nagpalapta sang bomb threat online.
Kahapon, gin-suspend ang klase matapos nga maglapta sang Lunes sang gab-i ang pamahog online nga bombahon ang EB Magalona National High School.
Ginseryoso man ini sang mga otoridad bisan pa nga matuod man ukon indi.
Sa interview sang Bombo Radyo Bacolod kay EB Magalona Vice Mayor Malvin Malacon, gin-instructionan na ang PNP kag DEPEd nga imbestigaran ang nasambit nga pamahog agud nga matumod ang may kahimuan sini.
Suno kay Malacon, ginapaimbestigaran sang alkalde ang natabo kag mahimuan sang tikang agud nga matapna ini bangud kun pabay-an ini ang mahimo nga himuon nalang nga labutaw, kag mas mabudlayan ang mga otoridad sa pagtumod kun ang pagpamahog ang matuod ukon indi.
Ginpasiguro man ni Malacon nga bisan nga nagalabutaw lamang ang naghimo sang bomb joke, magapatuman sang sanction ang EB Magalona Municipal Government.
Suno pa sa bise alkalde, bisan pa nga menor de edad ang naghimo sang bomb joke, kasuhan sila ni EB Magalona Mayor Matthew Louis Malacon.
Kag kun wala ang mga ini nadisiplina sang ila nga mga ginikanan, kasuhan man ang mga ginikanan.
Sa karun, may lead na ang mga ini kun sin-o ang naghimo sang bomb joke kag ginpalapta sa social media nga nagtuga sang pag-suspend sang klase kahapon.
