Ginakahangawa sang Bayan Muna nga gamiton nga political tool sang mga local officials ang pagpalawig sang termino sang Barangay kag Sangguniang Kabataan Officials para sa 2028 Elections.
Sa interview sang Bombo Radyo Bacolod kay Bayan Muna Executive Vice President Atty Carlos Isagani Zarate, indi maayo nga practice sa gobyerno ang masami nga pagpostpone sang eleksyon.
Panindugan nila nga kinahanglan nga mahatagan sang fresh mandate ang mga politiko kag mapalos na ang indi nagakadapat sa pwesto.
Nakita sang Bayan Muna nga ang mga Punong Barangay nga dapat ‘non-partisan’ ang gamiton nga political tool sa 2028 Elections.
Pahanumdom niya nga mahimo gamiton ang ‘utang na loob’ sa pag-extend sang termino para itib-ong sang mga Barangay officials ang mga nagduso sang pagpalawig sang ila termino.
Panindugan ni Zarate nga kun maayo ang opisyal, ini ang botohon lang gihapon sang mga pumuluyo.
Pahanumdom niya nga ang mga Sangguniang Kabataan officials ang indi na youth (yut na!), gani kinahanglan na nga may fresh mandate.
Suno kay Zarate, indi dapat tugutan ang kaangay nga scheme bangod ang nagapulos lamang sini amo ang mga kurap nga politiko.
Nagalaom ini nga desisyonan gilayon sang Korte Suprema ukon magpagwa sang Temporary Restraining Order, kun may magfile sang complaint.
Suno diri, preparado na ang Commission on Elections para sa filing sang Certificate of Candidacy (COC) sa LUnes.
Pahayag sini nga kun madugayan ang desisyon kag magdagdag sang TRO ang Korte Suprema, ma-alang alang sa preparasyon ang Comelec.
