Aminado ang Negros Oriental Police Provincial Office nga mabudlay ang pagkuha sang impormasyon tuhoy sa natabo nga shooting incident sa Sitio Cang-alaw, Brgy Buenavista, Santa Catalina, Negros Oriental kaina sang aga, bangod tuman na ka suludlon ang nabukid nga lugar.
Madumduman nga duha ang nakumpirmar nga napatay, isa ang ginabulong sa ospital, samtang may impormasyon naman nga nakapanago ang isa pa ka biktima, apang wala pa sang impormasyon tuhoy sa status sini.
Ang mga suspect ang gintudlo man sang biktima nga yara sa karun sa Sta Catalina Rural Health Unit.
Sa press conference ni NOrPPO Spokesperson Police Captain Stephen Jaynard Polinar, isa tubtob duha ka oras pa ang ginbyahe sang kapulisan tubtob makalab-utan sa dulunan kun sa diin lang kutob ang salakyan.
Kasunod sini, ang mga otoridad ang naglakat pa sang kapin tatlo ka kilometros antes malab-utan ang crime scene.
Una na nga gintumod nga konektado sa away sa boundary sang duta ang pagpatay.
Apang sa pahayag sang biktima nga yara sa ospital nga nagapahuway lamang sila nga apat upod sa iya duha ka utod kag bayaw, sa pahag kun sa diin sila nagahimo sang kopra sang hinali nga nag-abot ang duha ka suspect.
Ang mga ini ang lunsay hubog, nga nagsugo pa nga baklan nila sang makahulubog nga ilimnon.
Panindugan sang biktima nga wala sila sang kwarta gani wala nila ginsunod ang mando nga magbakal sang alcohol sa tyangge.
Apang kasunod nga gintanyag sang duha nga ibaligya nalang sa ila ang mga armas-luthang.
Kaangay sa nauna nga rasun, panindugan sang mga biktima nga wala sila sang kwarta para magbakal sang makahulubog nga ilimnon, gani mas labi nga wala sila sang pangbakal sang ginabaligya nga armas.
Didto na nagpalupok ang duha ka suspect.
Ang lugar ang gina-alegar infiltrated man sang Communist Terrorist Group (CTGs) gani ang kapulisan ang nagpaupod pa sa iban nga unit sang Armed Forces of the Philippines.
