Naaresto na ang duha ka mga suspect sa pagpangluthang sa Sitio Cang-Alaw, Brgy Buenavista Sta. Catalina, Negros Oriental.
Ini kasunod sa ginpatigayon nga hot pursuit operation sang kapulisan kun sa diin naaresto si Alyas Jos alas-2:16 sang hapon sa Sitio Palili, Brgy San Isidro, Pamplona, samtang si Alyas Wil ang nagsurrender naman kay Punong Barangay Enarciso Delazerna Jr. sang Brgy Buenavista alas-5:30 subong nga aga.
Gincorrect naman sang Police Regional Office Negros Island Region (PRO-NIR) ang nauna nga report, kag ginkumpirmar nga isa ang napatay, isa pilason, isa ang wala napilasan, samtang may isa ka missing sa krimen.
Nahibaluan nga sa pinaka-una nga impormasyon, duha ang napatay, isa ang napilasan, samtang nakapanago naman ang isa sa natabo nga pagpangluthang.
Nangin mabudlay ang pagtipon sang impormasyon bangod tuman na ka bukid kag suludlon ang area.
Sa pag-abot sang kapulisan, naabtan nila ang bangkay sang 59 anyos nga biktima nga residente sang Brgy Talalak, Sta Catalina, kag narecover ang duha ka basiyo sang .9mm sa crime scene.
Ang mga nakaluwas naman nga biktima amo ang nagkilala sa mga suspect.
Tatlo sa mga biktima ang mag-utod samtang bayaw naman nila ang isa.
Panaysayon sang mga nakaluwas nga nagapreparar na ang mga ini sa pagtulog sa ila nga payag sang mag-abot ang duha ka hubog nga suspect.
Ang mga ini ang gin-atubang sang isa sa mga biktima, kun sa diin gintanyag nila nga ibaligya ang ila mga armas luthang.
Apang sang magbalibad, didto na nagpalupok ang mga suspect.
Dead on the spot ang isa, napilasan naman ang isa nga nahingagaw sa Bayawan District Hospital, wala naman mapilasan ang isa, samtang ang isa ang naglumpad sa suba kag tubtob sa karun nagapabilin nga missing.
Pahayag sang mga ini nga antes paman, may issue na tuhoy sa boundary sang duta, kag may pagbaisay na sa tunga sang miyembro sang ila pamilya kag himata sang suspect.
Kasubong man ang away tuhoy sa pagharvest sang lubi sa gina-agawan nga duta.
