Ginpangalanan na ni Interior Secretary Jonvic Remulla ang pulitiko sa Mindanao nga gin-alegar imbolbado sa attempt nga ipalusot ang ginabanta sa P3.5 billion nga balor sang shabu sa Laos padulong kuntani sa Pilipinas.
Sa ginpagwa nga diagram ni Remulla, makita ang mga persons of interest nga gin-alegar involved sa pag-smuggle sang 521 kilograms sang methamphetamine hydrochloride ukon mas kilala bilang shabu.
Kalakip sa mga POI ang isa ka anay Bangsamoro Parliament member nga si Edriezan Hadji Nasser Rimbang.
Ginkasal si Edriezan Rimbang kay Princess Rohaniah Rimbang nga utod sang asawa ni alyas “Fahad” nga gin-aresto sa airport sa Laos.
Gin-alegar ginbayaran sini si Police Master Sergeant Aileen Jane Manalo Mendoza para sa landing rights sa private hangar kun sa diin natalana nga maghugpa ang eroplano.
Si Rioklyn Toledo naman ang nag-procure sang eroplano naggikan sa Malaysia padulong sa Laos.
Gin-athag ni Remulla nga wala pa nakahugpa sa Pilipinas ang nasambit nga eroplano.
Ginkumpirmar man ni Philippine National Police (PNP) chief Police General Jose Melencio Nartatez Jr. nga ginkakas nila sa puwesto kag yara sa restrictive custody sang Aviation Security Group si Mendoza samtang ang nasambit nga Sultan ang yara pa sa pungsod.
