Gin-akusaran ni Atty Paolo Panelo, tagpamaba ni Vice President Sara Duterte, ang Marcos Administration sa gin-alegar paggamit sang institusyon sang gobyerno para sa political persecution, kasunod sang mga pahayag sang National Bureau of Investigation (NBI) tuhoy sa mga gin-alegar discrepancy sa mga propiedad nga gindeklara sang Bise Presidente sa iya nga Statement of Assets,Liabilities and Net worth (SALN).
Suno kay Panelo, gin-release ni NBI Director Melvin Matibag sa media ang mga ginpahayag resulta sang imbestigasyon nga wala ginpahibalo sa bise presidente ang mga alegasyon kag mahatagan sang tsansa nga makasabat.
Ginkwestyon man sini ang pag-turn over sang report sa Office of the Ombudsman sa baylo nga hatagan si Duterte sang kahigayunan nga masabat ini sang direkta.
Dugang pa, ginpamangkot man sini kun ngaa wala ginlakip sang prosecution ang mga natukiban sang NBI sa impeachment trial, sa diin mahimo mausisa kag ma-counter sang depensa ang mga ebidensya nga i-presenta.
Suno kay Panelo, handa sila nga pamatud-an sa impeachment trial ukon sa Ombudsman nga husto ang deklarasyon sang bise presidente kun sila ang mahatagan sang pormal nga abiso.
