Dako ang pagpasalamat ni Bacolod City Mayor Greg Gasataya sa tanan nga mga nagpartisipar, nagbulig, kag nag-upod sa selebrasyon sang Bacolod Masskara Festival 2026.
Sa iya nga speech sa opening sang Street Dance and Arena Competition Barangay category, ginwelcome man sini ang presensya ni Taiwanese Ambassador Wallace Chao.
Ginpasalamatan sang alkalde ang tanan nga Barangay nga nagpakigbahin sa kompetisyon, nga kabahin sang pagpakita sang gugma kag pag-apresyar.
Pahanumdom ni Mayor Greg nga ginhiwat ang Masskara Festival kadungan sa creative peak sang Bacolod City, kag ini ang pagpakita sang resilience sang Bacolodnon sa pihak sang mga pagtilaw.
Ini ang nagapahanumdom sang pagpabilin sang pagpalangga, pagtuo, kag hugpong sang Bacolodnon, nga ginasaulog na sa sulod sang 46 ka tuig.
Suno kay Mayor Greg, ang Masskara Festival celebration, ang nagaserbe nga compass sa pag-atubang sa mga pagtilaw.
Para sa Festival Director sang Masskara Festival 2025 ang successful nga selebrasyon ang indi lamang kadalag-an para sa Bacolod Gugma Foundation, kundi kadalag-an sang tanan nga Bacolodnon.
Sa interview sang Bombo Radyo Bacolod kay Rodney Ascalon, ginapakamaayo sini nga sa last-day lamang nagbubo ang ulan, samtang ini ang wala man nakapatahaw sa energy kag stamina sang mga Masskara dancers.
Dako man ang pasalamat sini sa production team kag mga staff nga halos wala man sang pahuway para maseguro ang madinalag-on nga mga programa.
Suno diri, sa 3-day highlights napuno gud sang mgaf tawo sa mga festival sites, kag madamo gihapon makita nga tawo bisan alas-3:00 na sang kaagahon.
Aminado si Ascalon nga indi perpekto ang mga aktibidad kag may-ara gid sang glitches, apang pahanumdom niya nga ini ang dapat nga batunon agud ma-imprubar sa masunod.
Ginapasalamatan sini ang tanan nga turista ukon tanan nga nagselebrar sang Masskara Festival 2026.
Gintamyaw naman ni Bacolod City Mayor Greg Gasataya ang tanan nga mga nagdaog sa Street Dance and Arena Competition partikular na ang champion nga Barangay Taculing.
Kasubong man nga ginpasalamatan sini ang tana nga nagpartisipar, kag nakigbahin sa bilog nga selebrasyon sang Masskara Festival 2026.
Pahayag sini nga sa subong nga Masskara sila ang mas nagfocus sa tawo, gani nangin bukas para sa tanan nga sektor ang ila mga ginpatuman nga aktibidad.
