Generally peaceful ang assessment sang Police Regional Office Negros Island Region (PRO NIR) sa selebrasyon sang Bacolod MassKara Festival 2026 halin Oktubre 1 tubtob 18.
Kaina sang aga, nagpatigayon sang Culmination and Awarding Ceremony ang Bacolod City Police Office angot sa bag-o lang natapos nga Masskara Festival 2026.
Sa mensahe ni PRO NIR Director Bgen. Rudencindo Reales, wala sang may natabo nga related incidents sa mga festival sites, nga ginakabig nga resulta sang dedikasyon, kooperasyon kag pagbantay sang mga kapulisan kag security personnel.
Ginpasalamatan sini ang tanan nga kapulisan halin sa Police Regional Office 6 (PRO 6), Negros Occidental Police Provincial Office (NOCPPO) kag tanan nga security teams nga nagbulig agud mapabilin nga matawhay ang selebrasyon.
Kasubong man sa Local Government kag ang nagkalain-lain nga ahensya nga naghatag sang suporta kag nagbinuligay sa pagpatuman sang mga security measures sa bug-os nga festival.
Sa pihak sini, ginpahayag ni Reales nga magapahuway lamang sang isa ka adlaw ang mga kapulisan bangud magahanda naman sila sa masunod nga security deployment para sa nagahilapit nga tingkalalag.
Ginpasiguro ni Reales nga padayon kag handa ang kapulisan sa pagbulig kag paghatag sang seguridad sa nagkalain-lain nga mga aktibidad sa bilog nga Negros Island agud masiguro ang kaluwasan sang mga pumuluyo kag mga bisita.
Gin-engganyo man sini ang mga local kag international tourist nga padayon nga magbisita indi lamang diri sa ciudad sang Bacolod kundi sa bilog nga Negros Island Region.
