Magapatigayon sang Live Fire Artillery Exercise ang Philippine Army sa Sipalay City sa Oktubre 29 tubtob 31.
Sa interview sang Bombo Radyo Bacolod kay Major Jecey Batiller, spokesperson sang 3rd Infantry Division sang Philippine Army, sa una nga adlaw sila ang magapatigayon sang calibration test, kag pagpadayun sang live fire exercise sa ikaduha nga adlaw halin alas-7:00 sang aga tubtob alas-9:00 sang gab-i.
Apang ini ang indi man tayuyon, kun sa diin kapin 30 ka rounds ang palukpon.
Sa ikatatlo nga adlaw, sila ang magapatigayon nalang sang assessment sa resulta sang fire exercise.
Nagkoordinar naman sila sa banwa kag naghatag na sang resolusyon ang Sipalay City Council, samtang may clearance naman sila gikan sa City Environment and Natural Resources Office (CENRO) para sa impact area.
Nagpatigayon naman sang Community Meeting sa Brgy Manlucahoc, Sipalay City, agud mapahangop sa mga pumuluyo ang drill, samtang magadeploy man sang military personnel nga magaseguro nga wala sang makasulod sa site.
May-ara sang capacity nga anom tubtob walo ka kilometros nga malab-utan sang bala sang artillery ukon kanyon.
Suno kay Batiller humalin sang siya ang lieutenant pa lamang, sa Sitio Baras-barasan, Brgy Manlucahoc na sila nagapatigayon sang live fire artillery drill bangod ang kalaparon sang area ang husto gid sa capacity sang kanyon.
Ang tinutuyo sang aktibidad amo ang maseguro nga nakahibalo sa paggamit kag mapuslan ang mga military assets sa tion nga kinahanglan na nga gamiton.
Ang maga-operar sang mga ini amo ang Alpha Battery sang 3rd Field Artillery Battalion sang 3rd Infantry Division.
Apang sila ang yara sa idalom sang 302nd Infantry Battalion nga nakabase sa Tanjay City, Negros Oriental.
Liwat nga ginapahanumdom ni Batiller sa mga pumuluyo nga indi magkahadlok kun may mabatian nga pagsigabong, samtang panugyan niya nga likawan anay magsulod sa area.
