Ipalantaw pa sang gobernador sa Negros Occidental kun may legal basis nga makapwersa sa mga manugbakal sang baboy nga sundon ang ginrekomendar nga presyo sang live weight sang baboy sang Local Price Coordinating Council.
Nahibaluan nga sa rekomendasyon, ginapanugyan ang P165 per kilo nga pamakal sang live wieght, samtang P270 per kilo naman ang suggested retail price nga ginpirmahan sang Agosto 13, apang tubtob sa karun wala sang may nagatuman.
Nahibaluan nga sa karun yara na lamang sa P110 tubtob P115 ang pamakal sang live weight, apang wala man nagabag-o ang presyuhanay sa merkado.
Isa sa kahangawa sang mga backyard hog raisers ang nagapabilin nga banning sa pagsulod sang baboy kag pork products sa Cebu, kasubong man ang plano sang Iloilo nga pagsarado man sang ila border.
Samtang isa man sa ginatudlo sang hog raisers nga naga-apekto sa pagnubo sang baklanay amo ang padayun nga pagsulod sang imported nga baboy.
Pasalig man sang mga ini nga bastante ang supply para sa local consumption sa Holiday season, apang nagakahanga ang mga hog raisers sa dako nga kapierdihan kun magapabilin ang tuman ka nubo nga presyo.
