Suportado sang Alliance of Hog Raisers Association of Negros Occidental (AHRANO) ang tatlo ka adlaw nga “pig holiday” ukon temporaryo nga pagsuspend sang pagbaligya kag pag-ihaw sang baboy sa bug-os nga pungsod nga nag-umpisa sang Oktubre 22 , Huwebes tubtob Oktobre 24, 2026.
Ang nasambit nga tikang ginpangunahan sang Agricultural Sector Alliance of the Philippines (AGAP) kag Pork Producers Federation of the Philippines.
Suno kay (AHRANO) president Ric Lauron sa nasambit nga holiday, bug-os pwersa sila nga nagasuporta sa tikang nga ginhimo sang grupo sang mga manugbaboy sa Quezon City agud nga magpahayag sang ila sentimyento may kaangtanan sa sitwasyon sang swine industry kag ginapangatubang nga tuman ka nubo nga farm gate price.
Suno kay Lauron, gin-abisuhan sini ang mga association leaders nga engganyuhon ang mga hog raisers agud nga supportahan ang lihok sang ila counterpart sa Manila nga pig holiday.
Sa pig holiday, gina-engganyo ang mga hog raisers nga indi anay mag-ihaw ukon magbaligya sang baboy sa merkado.
Suno diri, apisar nga nagahilapit na ang bulan sang Nobyembre kag Disyembre wala gid sang pagbag-o sa presyo sang live weight.
Nagalaom man ini nga may mahimo nga tikang provincial government sa Negros Occidental agud nga sila ang mabuligan sa ginapangatubang nila nga kabudlayan.
