Wala nagakahulugan nga luwas na sa salabton si Vice President Sara Duterte sa pag-atras sang House prosecution panel sang tatlo sa apat ka mga impeachment articles batok sa iya, bangud mahimo gihapon nga ini ang lauton sang magkatuhay nga mga legal nga proseso nahanungod sa mga alegasyon sa tatlo ka artikulo.
Ini ang ginpaathag ni Akbayan party-list Rep. Perci Cendaña, nga nagsiling nga estratehiya sang prosekusyon ang pag-atras sa tatlo ka mga artikulo agud mapadasig ang resolusyon sa impeachment case batok sa bise presidente.
Sa interview kay Cendaña, ginpahayag sini nga mahimo mangin bentaha sa respondent kun palawigon pa ang trial kag posible nga amat-amat madula ang interes sang publiko sa kaso.
Suno diri, mahimo mag-file sang kaso batok kay Duterte, sa Office of the Vice President (OVP) kag sa tion nga nagserbe ini bilang tiglikom sang Department of Education (DepEd) may kaangtanan sa paggamit sang confidential kag intelligence funds, santo sa layi kag proseso.
Ginhatagan man pagtamod ni Cendanya ang pinal nga disallowance sang Commission on Audit (COA) sa P73.28 million nga confidential expenses sang OVP bilang posible nga basehan sang dugang nga tikang sang Office of the Ombudsman.
