Magasaka na ang minimum wage sa Western Visayas lakip na sa Negros Occidental kag Bacolod City matapos gin-aprubahan sang Regional Tripartite Wages and Productivity Board ang Wage Order No. 30.
Suno kay RTWPB-Western Visayas Chairman Sixto Rodriguez Jr., gin-aprubahan sang board ang Wage Order No. 30 sang Oktubre 21 kag ginsumiter ini sa National Wages and Productivity Commission (NWPC) para sa kumpirmasyon.
Sa idalom sang bag-o nga wage order, magasaka sang P45 ang minimum wage sa sektor sang agrikultura, gikan sa P520, ini ang mangin sa P565.
P40 naman ang dugang sa sweldo sa mga trabahador sang non-agriculture establishments nga may masobra sa napulo ka empleyado, gikan sa P550, ini ang mangin P590.
Samtang, P40 man ang dugang nga sweldo sa mga trabahador sang non-agriculture establishments nga may napulo ukon mas manubo nga empleyado nga mangin P565 gikan sa P525.
Para naman sa mga domestic worker ukon kabulig sa puluy-an, magadugang sang P500 ang ila bulanan nga minimum wage nga gikan sa P6,500, ini ang mangin P7,000.
Ginalauman nga ini ang maga-epekto sa masunod nga bulan.
Apisar nga ang Negros Occidental ang kabahin na sang Negros Island Region (NIR), yara sa gihapon ang probinsya sa hurisdiksyon sang RTWPB-Western Visayas samtang wala pa natukod ang separado nga wage board para sa NIR.
