Ginpasalig sang National Irrigation Authority – Negros Occidental nga indi madulaan sang tubig ang mga rice farmers apisar sa ginapaabot nga dry spell tuga sang Super El Niño.
Sa interview sang Bombo Radyo Bacolod kay Engr. Edna Seniadoza, manager sang Irrigation Management Office sang NIA-Negros Occidental, sila ang may duha ka national irrigation system, kag 112 ka communal irrigation system.
Pasalig sini nga wala gid naganubo sa critical ang water level sa mga suba.
Samtang sila ang may rotational wetting kag drying system nga nakadepende man sa cropping season.
Paathag ni Seniadoza nga indi man makamaayo kun tuman ka damo sang tubig sa mga talamnan, bangod mas nagadako ang patubas kun hustuhan lang ang tubig.
Samtang tayuyon man ang dessilting activity sang NIA sa mga suba.
Nagalaom ini nga apisar sa Super El Niño, may mga pag-ulan gihapon nga malauman.
Ini bangod dry spell lamang ang ma-eksperyensyahan sa Negros Occidental, nga nagalawig lang sang isa tubtob duha ka bulan nga maiwat ang ulan, samtang drought na kun maglapaw pa sa duha ka bulan.
Ang dry spell ang lauman sa Disyembre tubtob Enero.
Luwas diri, sa mga rain fed areas ukon mga lugar nga wala pa nalab-utan sang irrigation system, may ara naman sang na-install nga 20 ka solar pumping stations, nga makabulig sa mga mangunguma.
Apang sa mainit gid ang tiyempo kag mabudlay sa tubig sa isa ka lugar ginapanugyan man nila ang temporaryo nga pagtanom sang diversified crops kaangay sang monggo, kamote, watermelon kag iban pa.
