Gintindugan ni Bacolod City Councilor Al Victor Espino nga may basihan ang ginsumiter nga committee report sang gintukod nga tri-committee may kaangtanan sa status sang P4.1 billion loan kag mga proyekto nga napondohan sini.
Ini matapos ginpasar sa session sang Sangguniang Panlungsod ang resolusyon ni Councilor Wilson “Jun” Gamboa nga nagarequest sa Local Finance Committee sa pagsumiter sang report kag review tuhoy sa status sang loans.
Sa interview sang Bombo Radyo Bacolod kay Espino, ang ginsumiter nila nga committee report nga nagpakita nga P2.4 billion pa lamang ang narelease nga budget, ang nakabase sa pila ka bulan nila nga pag-usisa kag pagtipon sang mga datos.
Dugang pa niya nga ang tri-committee ang gintukod paagi man sa resolusyon, nga ginalakipan sang iya komitiba nga Committee on Laws and Ordinances, Committee on Government Asset ni Councilor Atty Caesar Distrito, kag Committee on Finance ni Councilor Thaddy Sayson, nga amo ang lead committee.
Ginakwestyon sini ang resolusyon bangod kaangay nga ginbaliwala lamang ang ila nga ginsumiter nga report.
Dugang pa niya nga sa pagsumiter sang committee report, ini ang makonsiderar na nga propedad sang konseho, gani sarang gid makahimo sang kwestyon ang sin-o man nga miyembro.
Pasalig ni Espino nga handa ini nga magsabat, apang panawagan niya nga maglatag sang factual kag objective questions, kag indi labang bangod sa naratibo sa social media ukon pamolitika.
Panindugan sang konsehal nga 21 ka tuig na ini sa legislation, kag nakahibalo ini sang iya ginahimo.
Sugot man ini sa pag-organisar sang debate.
