Sa Oktubre 30 tubtob Nobyembre 1 pa ang ginalauman nga pagdagsa sang manugbakal sang mga gata para sa mga lutuon sa tigkalalag.
Sa pagtsekyar sang Bombo News Team sa Burgos Public Market, amat-amat na nga nagastock ang mga baligyaan sang mga produkto nga mabakal sa tigkalalag.
Sa interview sang Bombo Radyo Bacolod kay Ivan Azucena, store owner, ang presyo sang lahing ang naga-range sang P30 tubtob P50 depende sa sizes.
Sa 20 ka tuig nga pagbaligya sa merkado, aminado ini nga kalabanan sa mga manugbakal ang nagapili sang napuga na nga gata, agud ini ang ilunod na lamang nila sa mga lulutuon.
Luwas sa mga nagabakal sang gata paagi sa pagpili sang lahing nga lubi, may-ara naman sila sang naputos na ngadaan sa ice wrapper nga ginabaligya nila sa balor nga P20.
Ini ang masami nga ginabakal sang mga nagapangita sang gata para lamang sa lulutuon nga sud-an.
Samtang ang mga masami nila nga suki, amo ang mga karenderia, restaurant, delivery, nga madamo kun magbakal.
Wala naman sang pagbag-o sa ila nga presyo apisar sa okasyon.
Sa pihak nga bahin, ang pilit ang mabakal naman sa balor nga P55 tubtob P60.
Samtang sa ila nga store, ang brown sugar ang mabakal sa balor nga P70; wash sa P75; kag ang muscovado ang mabakal sa balor nga P100.
